最近欣賞咗我參加嘅合唱團嘅音樂總監所帶領嘅另一個合唱團嘅音樂會，請容許我狗腿一下，擦吓佢嘅鞋：

陳家曦博士不單響教育局從事藝術教育工作，私底下亦都為唔少嘅合唱團做音樂總監，而佢以前所帶領嘅合唱團亦都參加過外國嘅合唱比賽攞到獎嘅。牌面非常勁，但係我哋今次先至有幸聽佢指揮嘅合唱團表演。

表演嘅呢個合唱團同佢合作咗10多年，所以佢對佢哋嘅音準非常之有信心，今次音樂會所揀嘅合唱曲目嘅音準要求都非常高，而個表演係非常之出色嘅。

呢個音樂會唔單止佢指揮，佢仲俾機會後生嘅上位，貫徹佢對音樂教育嘅落實支持。

咁音樂唔係死練就得㗎嘛，所以音樂教育點教都好重要，喺佢身上就體現咗啦，好似教數拍子咁呀，點樣令小朋友明白，覺得有趣，從而跟從你去做呢？

喺網度經常見到啲小朋友學音樂學到喊住咁學，為咩呢？我細個嗰陣時學音樂都係希望音樂成為你嘅支持，唔係摧毁你嘅力量。所以音樂老師絕對係非常之重要㗎。唔係唔練，而係要令小朋友有Motivation去練，咁樣佢先欣賞到音樂嘅靈魂。

最近課金聽咗呢個音樂會，全城熱賣一票難求好辛苦先拗到張飛返嚟，都預咗佢哋會炫技㗎啦，結果真係盡顯工價，啲技術超高超，絕對唔係彈三隻小豬咁樣嚟Hea你嘅。

難得係佢哋所顯示嘅，除咗係超高超嘅技術之外，仲有意境，呢個就難達到啦，因為死練只會將自己嘅靈感冚嘭唥消滅晒，毫無感情嘅音樂就好似撒但音律，令人反感。

而佢哋嘅表演就可以令我喺短樂曲中得到無上嘅靈感，我都係第一次可以喺咁短時間之內有咁好嘅體會。

響成個演奏中，我去咗外太空見到一棵玫瑰同小水滴喺度玩緊，又去咗中東欣賞沙漠裏嘅月色，當然啦，亦都欣賞係一片混沌中神嘅應許係幾咁知突出，令人讚嘆作曲嗰個人嘅靈命之高，先可以有咁嘅音色。

最遺憾嘅係因為外部因素，令我唔可以將佢哋串連起來。因為係全場爆滿啊，唔可以保證觀眾質素，有啲茂利喺一首樂曲之後拍掌，阻住善於音樂欣賞嘅人同表演者嘅聯繫，見到表演者都好努力咁阻止佢哋㗎啦，無奈茂利太多啦⋯⋯

所以我都係比較鍾意去一啲私人嘅音樂會，嗰度通常都係圍威喂，大家都係為咗欣賞音樂而去嘅，亦都識點樣欣賞音樂嘅，唔係嘅話要靜靜地坐三四粒鐘絕對係一個折磨嚟㗎，我就見到隔籬個妹妹仔，坐到最後成條毛毛蟲咁喺個座位度扭嚟扭去啦，絕對係打擾到其他人嘅，希望有人教佢點樣欣賞音樂啦⋯⋯

終於有人喺香港搞Aida啦，呢套劇超震撼亦都出名超高音，最高音係去到high F，所以有幸可以聽到現場實在三生有幸！

因為呢套戲太出名啦，出名在嗰啲後台嘅class勁華麗嘅，所以呢個budget出名係多嘅，所以我都好期待Opera Hong Kong會點樣將佢落地。

最後我見到個台係用咗香港最出名嘅搭棚技術搭咗兩邊形成一個金字塔嘅透視內圖，最特別嘅就係個金字塔係可以轉嘅，作為理學生出生嘅我，就好擔心佢實唔實淨呀，所以見到個鬼佬演員走埋去挨挨蹦蹦，我都幾驚恐㗎⋯⋯

而我最期待個high F，同埋一連串嘅high CD E，個鬼佬都真係唱得好好，係Coloratura Tone嚟㗎，不過稍嫌肥膩咗少少，因為我喺Social Media都add咗唔少opera singer，佢哋要樣有樣，要身材有身材，最緊要仲係唱得好高，亦都好樂意同啲網友分享佢哋嘅聲線，所以set到所有聽眾嘅expectation都好高。不過同佢哋嘅距離近咗嘅唔好處就係，我坐喺屋企都感受到culture shock！

不過，香港嘅團隊都非常用心將佢落地，有唔少嘅場面，佢冇將所有Choir搬晒喺個台度，而係用咗後台都好應聲呢個特點，要啲人嚮後台度唱，令到觀眾更加注意台上嘅鬼佬演員嘅演技，配合Aida咁緊湊嘅劇情，個Arrangement真係超絕啊，而我，作為業餘嘅合唱團分子，睇到咁嘅景況我都超驚恐，以後都唔敢喺後台度講嘢啦！

個結局真係最令人揪心啊，Aida逃出去之後發現天大地大，但係無處容身，最後都係返返去同佢嘅愛人一齊受死。同一時間個Aria就將Amneris感嘆冇人愛佢，佢愛嘅人唔愛佢擺埋一齊，形成一個強烈嘅對比。

最近欣賞左一場精彩嘅Opera，係盧景文先生嘅製作。

最欣賞嘅地方係粒粒音都係用head voice 出嘅，完全冇喉嚨聲，所以我喺中後排嘅位置粒粒音都聽得好清楚。表演者嘅聲量控制係非常之出色，非常清楚環境嘅acoustic 同埋自己聲音嘅blending 出嚟嘅效果，只有自細就接受專業嘅聲樂訓練先可以做到呢種效果。

想當初盧景文先生孤身一人飄揚渡海去學音樂，到而家用咗佢嘅一生去建立香港嘅音樂生態系統，無論係觀眾教育令佢哋知道點樣去欣賞音樂，到無私咁將自己拗返嚟嘅秘技傳授比下一代嘅音樂人，令佢哋可以用音樂都搵到食養妻活兒，咁樣嘅一個生態環境實在係花咗無數人嘅一生去建立嘅，實在令人感動。

呢出個劇係講述戰爭中嘅愛恨情仇，好難想像莫札特響10幾歲就有能力處理咁複雜嘅議題，無論係story telling ，音樂舖排都相當成熟，唯一缺憾係聲樂技巧要求非常高，但係盧景文先生都培養左啲male falsetto喎，實在令人非常之驚喜。

我都係第一次現場聽falsetto嘅表演，佢完美咁樣將falsetto Voice同埋head Voice blend埋一齊，仲有啲地方用埋自己把真聲去處理，處理方法令人相當有啟發性，總之就係大開眼界啦。

我對獻詩嘅印象一向都係choir將從上主而來嘅聖靈感動發射比每一個聽眾，所以歌聲講求穿透感，共鳴感。

但係獻唱的時候我就覺得我打咗好多斧頭，從上主而來嘅祝福唔係100%傳送哂出去嘅，袋咗落袋唔少，感覺非常之着數。

心中默默咁樣就覺得施比受更有福呢句說話嘅重點，第一層嘅感覺係受者，呢度嘅話就係我哋嘅聽眾啦，佢哋無條件得到我哋嘅祝福，聽落好似賺咗，但係重點係唱嗰個係冇蝕到嘅，相反仲賺咗好多，因為從上主而來嘅祝福係無限嘅，最緊要係我哋接受到幾多，響施與嘅過程中我哋增加咗我哋嘅容量，講緊可能開頭係幾gram，慢慢變成kilogram最後可能去到幾噸嘅轉化過程，神成就無限嘅感動。

今日我分享吓我嘅音樂之路啦。

我嘅祖先出名好音律嘅，曾經有祖先試過以士大夫的身份娶咗一個名伶的女兒為當家主母，爆炸程度同依家英王查理斯娶咗卡米拉差唔多。

所以當我人生中第一個課外活動揀咗音樂欣賞，神就安排我係小學五年班開始參加兒童合唱團，小學嘅時候就經常周圍去表演，香港嘅大會堂大致都去表演過㗎啦，文化中心喺我小學嗰陣時啱啱起好，我亦都見證咗佢嘅開幕典禮。我都好感恩我遇到好好嘅老師，為我打咗一個好好嘅音樂基礎，坐底我嘅音係準嘅，呢個我好有信心。

上到中學嘅時候，我參加咗中學嘅合唱團，但係我開始遇到我人生中第一個打擊啦，我要面對轉聲呢個階段，當時身邊嘅人都同我講女仔有90%都會變得高音，所以我都好期待我可以再唱多啲高音，但係好唔好彩，我變咗老牛聲，連之前嘅高音都唱唔到，我個Range低咗好多，我接受唔到所以就冇再唱歌啦。

入到大學，去咗政府度做暑期工，點知嗰度啲人讚我把聲靚喎，仲欽點叫我幫佢對數，呢個讚賞係一粒種子中咗喺我嘅心裏面。令我對我把聲有返啲自信。

出道社會工作忙咗好耐之後，終於學識work life balance 啦，所以我就開始又唱返歌啦，靠住我細個嘅記憶咁就開始練我啲高音啦，唔知係咪個成效太差啦，我養嗰隻貓都頂我唔順，隻貓高音就教我點樣用Head Voice啊，佢又成功教識我喎，所以我就用到Head Voice。

同一時間我亦都參加咗香港大學校友會合唱團，開頭只咁玩altos 。但係等我學識heads Voice嗰陣時，合唱團嘅朋友就約咗啲老師一齊學下聲樂，咁我就跟去啦，點知個老師就暗示我係female falsetto 。一聽到我都半信半疑嘅，但係有本錢喎，冇理由唔試吓，所以我申請reaudit 轉咗去玩sopranos 啦。亦都好順利成為咗S one。咁我成為S1都係呢幾年嘅事，數吓手指今年已經係我第10年參加呢個合唱團。

呢個就係我so far嘅音樂之路，大部份嘅經歷都係喺我信主之前嘅，但係我就深信主嘅愛好似以下嘅經文咁樣

“因為我深信，無論是死，是活，是天使，是掌權的，是有權能的 ，是現在的事，是將來的事， 是高處的，是深處的，是別的受造之物，都不能使我們與上帝的愛隔絕，這愛是在我們的主基督耶穌裏的。”

‭‭羅馬書‬ ‭8‬:‭38‬-‭39‬ ‭

所以，在我認識神之前，神已經為我預備好事奉神嘅條件，等一齊條件成熟，我就係到為神作見證同埋將榮耀歸與神。

近呢一兩年參加咗church choir ，近排練緊一套難度非常高嘅合唱曲目，音又高又多字速度又快，我估我到表演嗰陣時都未必練到啲字，有啲高音位嘅字都要啦咗佢就算。

近排四部開始一齊練啦，就會發生同一個聲部出現兩三條龍嘅情況，但值得一讚嘅係，大家都係好有經驗嘅Choir，發現唔妥嘅時候，大家都會停一停，聽返個beat ，再跟返大隊。

因為我哋係合唱，冇必要好似solo咁樣，the show must go on。你跟唔到個beat。唔代表人哋跟唔到，所以發現唔對路，停一停都係要值得一讚嘅。

就好似人生咁樣，你發現好似唔對路喎，智者都係會叫你停一停，靜一靜，諗一諗，再決定你嘅前路，最後先至跟返個社會節奏，重新上路。

所以Church Choir咁值得人參加就因為你會發掘到好多道理喺入邊，對你做人做事都好有得着。

昨天欣賞了一場精彩嘅音樂劇，香港製造，無花假。好感動香港這個彈丸之地出了這麼多種類的人才，無論在劇本，舞台設計，音樂創作，歌唱技巧，舞蹈表演，音響設備都係成熟且扣扣相環的，令人醉心於他們的演出中。

故事講述清朝的一個狀師的改邪歸正，全劇涉及多條人命，劇力萬鈞，同時唏噓古時候人命唔值錢⋯⋯

全劇採用廣東話歌詞，配合中式旋律，強勁嘅節奏，創造出一個獨一無二嘅空間，既時尚又古典，絕對唔奇怪佢拎到國家嘅資金，希望呢出劇可以衝出國際啦，成為名留青史代表香港之作。

Recently, I attended a class held by psychologist. We discussed how to love without being exhausted. She suggested we love people like running companies. Some books are well balanced, but some books are always in debt. So we put in resources to keep it running. Where does the resources from? Of coz from the profitable companies.

The key of this concept is to keep investing and seldom to maintain only one book. Then the cash flow we generate will increase with time.

Is it interesting to love in this way?

好感動，睇住科技一日比一日進步，從收音到播放嘅技術都有提升，令到合唱歌都有啲嘢聽啦，希望你欣賞