20251119 雅樂社55週年音樂會

最近欣賞咗我參加嘅合唱團嘅音樂總監所帶領嘅另一個合唱團嘅音樂會，請容許我狗腿一下，擦吓佢嘅鞋：

陳家曦博士不單響教育局從事藝術教育工作，私底下亦都為唔少嘅合唱團做音樂總監，而佢以前所帶領嘅合唱團亦都參加過外國嘅合唱比賽攞到獎嘅。牌面非常勁，但係我哋今次先至有幸聽佢指揮嘅合唱團表演。

表演嘅呢個合唱團同佢合作咗10多年，所以佢對佢哋嘅音準非常之有信心，今次音樂會所揀嘅合唱曲目嘅音準要求都非常高，而個表演係非常之出色嘅。

呢個音樂會唔單止佢指揮，佢仲俾機會後生嘅上位，貫徹佢對音樂教育嘅落實支持。

咁音樂唔係死練就得㗎嘛，所以音樂教育點教都好重要，喺佢身上就體現咗啦，好似教數拍子咁呀，點樣令小朋友明白，覺得有趣，從而跟從你去做呢？

喺網度經常見到啲小朋友學音樂學到喊住咁學，為咩呢？我細個嗰陣時學音樂都係希望音樂成為你嘅支持，唔係摧毁你嘅力量。所以音樂老師絕對係非常之重要㗎。唔係唔練，而係要令小朋友有Motivation去練，咁樣佢先欣賞到音樂嘅靈魂。